ИМФ бірлестігінің онкүндігі аясында өткізілген іс шаралар
А.У. Сарсенова,
математика пәнінің бірлестік жетекшісі
Оқытудың инновациялық технологияларын информатика, физика, математика сабақтарында қолданудың тиімді әдіс-тәсілдері
Оқушылардың танымдық қабілеттерін қалыптастыруда жаңа технологияны пайдаланудың тиімді жолдары мен әдістерін дамыту мақсатында 20.01.2020–30.01.2020ж. аралығында иформатика,физика, математика пән бірлестігінің онкүндігі өтті.
Онкүндіктің жоспары бекітіліп,оқушылар мен ұстаздарға таныстырылды. Жоспар бойынша ұйымдастырылған іс- шаралар мен ашық сабақтар заман талабына сай оқытудың инновациялық технологияларын сабақтарда қолданудың тиімді әдіс-тәсілдерін пайдалану арқылы жаңартылған білім мазмұнына сай өткізілді.
Онкүндіктің ашылуы 20 қаңтар күні бірлестік мүшелерінің қатысуымен өткізілген дөңгелек үстелмен басталды. Жоғарыдағы бұйрық бойынша бірлестіктің жұмыс жоспарының орындалуы және құжаттары, пән мұғалімдерінің жеке іс-қағаздары, бөлім бойынша жиынтық бағалау, тоқсандық жиынтық бағалау,олардың жүргізілу технологиялары мен бағалау,модерацияның жүргізілу жағдайы тексерілді. Сонымен қатар,білім алушылардың жұмыс дәптерлері және 11-сынып білім алушыларының жазба жұмыстары (бақылау жұмыстары), 5-11- сыныптардағы оқу бағдарламасының орындалуы тексерілді , яғни Қазақстан Республикасы Білім және ғылым министрінің 2013 жылғы 3 сәуірдегі №115 бұйрығымен бекітілген 9- 11- сыныптар информатика, физика, математика пәндерінен оқу бағдарламасына сай жасалынған. Қазақстан Республикасы Білім және ғылым министрі міндетін атқарушысының 2017 жылғы «25 » қазандағы № 545 бұйрығымен бекітілген Негізгі орта білім беру деңгейінің 5-10-сыныптарына арналған информатика, физика, математика пәндерінен жаңартылған мазмұндағы оқу бағдарламасына сай жасалған. Электронды журналдың толтырылуы, БЖБ және ТЖБ бағаларының сәйкестігі қаралды. 6- сыныптардағы «Математикалық логика», 9 «А» сыныбында «Физика ағылшын тілінде» таңдау пәні, 11 «А» сыныбындағы «Теңдеу мен теңсіздік», «Функция және оның қасиеттері», «Физика және эксперименттік тапсырма», «Физикадан есептер шығару практикумы», «Физика және Қазақстан энергетикасы»,11-сыныптардағы «Теңдеу және теңсіздік», «Интегралдық есептеу», «Белсенді логикалық математика» қолданбалы курсының өтілу барысы бақыланды. 9,11- сыныптар бойынша қорытынды аттестаттауға дайындық жұмыстарының жүргізілу барысы зерделеніп,тексерілді. Оқушылардың дайындық жұмыстары тақырыптық тестермен жүргізіледі. Білім сапасын көтеру мақсатында оқушылармен жүргізіліп отырған жұмыстың барысы, уәжі төмен білім алушылармен жүргізілген жұмыс түрлері қаралды. Математика және физика пәнінен уәжі төмен білім алушылар анықталып, мұғалімдер қосымша жұмыстар жүргізген. Білім деңгейі «3 пен 4-ң» арасындағы білім алушылардың білім сапасын арттыру мақсатында пән мұғалімдері бақылау парағын арнаған. Сондай–ақ, дарынды білім алушылармен бір жылдық жұмыс жоспары жасалған, жұмыстар жүргізілуде.Атап айтатын болсақ: Республикалық дарынды оқушыларға ұйымдастырылған шығармашылық «ILEADER.KZ- жас көшбасшы» байқауында «Үздік ғылыми жоба» номинациясы бойынша 5 «А» сынып білім алушысы Ержан Дильназ және 7 «Б» сынып білім алушысы Есентаев Мейіржан I дәрежелі дипломмен марапатталды, пән мұғалімдері Ж.С.Алдатаева, Сатылғанова Кулайхан. Республикалық «Жас білімпаз» олимпиадасына қатысып «КИО-2019» номинациясы бойынша II дәрежелі диплом иегері атанған 5 «Г» сынып білім алушысы Ынтықбай Дінмұхаммед, пән мұғалімі А.Сарсенова. Физика пәні бойынша қалалық олимпиада III орын иеленген 9 «В» сынып білім алушысы Егемберді Нұрзат, пән мұғалімі Қуанышева А.К. Қалалық «Самұрық» математикалық зияткерлік сайысының алтын медаль иегері атанған 5 «А» сынып білім алушысы Иса Жания, пән мұғалімі Ж. Алдатаева, II орын иегерлері Абдрахман Диана, Миртай Ерасыл, Шамшилда Аяулым пән мұғалімдері Қ.Жылысбаева, Қ.Абишбаева, Ә.Үмбеталиева.
Жалпы ИФМ пән бірлестігінің құжаттары мен жұмыстары онкүндік аясында жүйелі деп анықталды.
Қаңтар айының 20 күні мектеп ауласында Б. Арынова, К.Сатылғанова, А.Қуанышеваның ұйымтастыруымен «Табиғат -информатика, физика және математика тілімен сөйлейді.Бұл тілдің әріптері-дөңгелектер, үшбұрыштар және басқа фигуралар мен формулалар» тақырыбында ИФМ бірлестігінің онкүндік іс-шарасының ашылу салтанаты өтті және осы тақырып аясында мектеп фойесі қабырға газеттерімен безендірілді.
Онкүндік барысында мұғалімдер жаңартылған білім беру мазмұны бойынша жаңа технологияның әдіс- тәсілдері арқылы білім алушылардың танымдық қабілеттерін қалыптастыра отырып,білім алушылардың пәнге деген қызығушылығы мен ынтасын арттыра түсті.
21.01.2020 күні 5- сынып білім алушылар арасында математика пән мұғалімдері Қ.Жылысбаева және А.Сарсенованың ұйымдастыруымен білім алушылардың шығармашылық қабілеттерінің дамуына, өзіндік ой – пікірлерін жазба жұмыстарында тұжырымдап жеткізе білуге үйрету мақсатында «Зерделі тұлға» олимпиадасының 2019-2020 оқу жылындағы қысқы маусымдық кіші мектепішілік олимпиадасы өткізілді.Олимпиадаға 15 оқушы қатысып, берілген есептердің қызық әрі ізденімпаздыққа баулитындығын айтып кері байланыс қалдырды. Жеңімпаздар апталықтың қорытынды іс-шарасында марапатталды.
21.01.2020 күні 5 «Д» сыныбында информатика пәнінен А.Силханова «Алгоритм түрлері» тақырыбында ашық сабақ өтті.Сабақты жағымды ахуал қалыптастырып, санау арқылы екі топқа бөлуден бастады. «Қоржындағы сұрақтар» әдісі арқылы өткен сабақты қайталап, жаңа білімді қима қағаздардағы бейнеленген суреттерді талдау арқылы түсіндірді. «Плюс-минус» әдісі арқылы жаңа білімді пысықтады. «Bilim Land» тапсырмалары арқылы сабақты қорытындылады.Сабақ соңынды «Жапондық бағалау» әдісі арқылы бағалау орын алды және тиімді кері байланыс орната білді. Мұғалім топта жасаған жұмыстарды мадақтама сөздер арқылы бағалап, оқушы жұмысына мадақтау сөздер айтып отырды. Оқушылар сабаққа өте жақсы қатысып, қызыға атсалысып отырды. Сабақ шынайы болды, өмірмен байланысты өтті.
22.01.2020 күні мектеп коучы физика пәнінің мұғалімі К.Сатылғанова «Информатика,физика және математика пәндері бойынша БЖБ және ТЖБ тапсырмаларын құрастыру» тақырыбында семинар-тренинг өтті.Семинар –тренингте мұғалімдер бөлім бойынша жиынтық бағалау тапсырмаларын құрастыру жолдарымен танысты.Сонымен қатар жабық және ашық тапсырмалар,дескриптормен бағалау критерийлерін құрастырды.Жабық және ашық тапсырмалардың артықшылығымен кемшіліктерін сараптап,түрлерін ажыратты.Коучинг соңында «Ойлаудың бес гүлі» арқылы кері байланыс орын алды.Коучингтен мұғалімдер көптеген мағлұматтар алып кетті.
22.01.2020 күні 10 «А» сыныбында физика пәнінен А.Қуанышева «Зарядтың орын ауыстыруы кезіндегі электр өрісінің жұмысы» тақырыбында ашық сабақ өтті. Сабақты сыныпта жағымды ахуал қалыптастыру мақсатында «Жылы лебіз» ой сергегін өткізу арқылы бастап,тақырыпқа сай сыныпты үш топқа бөлді. «Жалғасын тап» әдісі арқылы үй тапсырмасын сұрады. Қалыптастырушы бағалау тапсырмалары арқылы «Ойлан, топтас, талқыла» әдісімен топтық жұмыс жүзеге асты. Бұл бөлімде білім алушылар өздерінің алған теориялық білімін есептер шығаруда қолданды.Үш топқа үш түрлі есепер жазылған қима қағаздары берілді.Топтар есептерін алмастырып,тақтадан дұрыс жауабымен тексерді. «Басбармақ» арқылы топтар бірін-бірі бағалайды. «Тапқырлық таныт» әдісі арқылы мұғалім белсенділік танытпаған білім алушыларды тарта білді. Мұғалім сабақ бойы оқушыларға мадақтау сөздері арқылы кері байланыс беріп отырды. Сабақта зерттеушілік әңгіме көбірек қолданылды. Әр тапсырмалар берілгенде дескрипторлармен толықтырылды.
23.01.2020 күні 10 «В» сыныбында алгебра пәнінен Қ.Жылысбаева «Бүтін коэффициентті көпмүшенің рационал түбірлері туралы теорема тақырыбына есептер шығару» тақырыбында ашық сабақ өтті.Сабақта «ромбы» , «+ ,-,қызықты», «дауыл сұрақ» деген әдістерін қолдану арқылы оқушылардың пәнге деген қызығушылығы артып, сабақ өз мақсатына жетті.Әсіресе сабақтың негізгі кезеңінде «Ромбы» әдісі өте тиімді болды. Кері байланыстың нәтижесі бойынша келесі сабақта тағы да «Ромбы» әдісі арқылы топтар арасында құрылған дескрипторды салыстыруды жоспарлау көзделді. Мұғалім сабақта уақытты жүйелі пайдаланды және жасаған жұмыстарды мадақтама сөздер арқылы бағалап, оқушы жұмысына мадақтау сөздер айтып отырды. Оқушылар топта жұмыс жасауға дағдыланған,өз беттерінше жұмыс жасай алады. Қалай оқу керектігін біледі.
Үй тапсырмасын «Өз-өзіңді тексер» әдісі арқылы тексертіп «Басбармақ» арқылы өз-өзін бағалатты, оқушылар шынайы бағалауға дағдыланған. «Ақиқат және жалған» әдісі арқылы өтілген формулалардың тұжырымдамасын қайталатты.Жаңа сабақтың тақырыбын ребус шешу арқылы ашты.Сен мұғалімсің «Қатесін тап» әдісі арқылы топтық жұмыс болды.Сабақты «Математиканың өз тілі бар-ол формула» деген ұстаныммен қорытындылап, уәжі төмен оқушыларға көбірек көңіл бөле білді. Мұғалім сабақта оқушыларды «Бағдаршам» тәсілі арқылы бағалап, мадақтау сөздерді әрбір тапсырма кезеңінде қолданып отырды. Сабақ соңында «Білім қоржыны» әдісі арқылы тиімді кері байланыс орната білді.
28.01.2020 күні 10 «А» сыныбында оқушылардың білім сапасын және қызығушылығын арттыру мақсатына бағытталған білім алушылармен үйірме сабағынан Е.Закен «Қозғалыс дегеніміз не?» тақырыбында сыныптан тыс жұмыс өтті. Оқушылар сабаққа белсенді қатысты. 3 кезең бойынша білім алушылар берілген тапсырмаларды белсенді орындап, сабаққа деген ынтасы мен аса жоғары қызығушылығын көрсетті. Сабақта оқушылар өз ойларын еркін жеткізді.Әр кезең сайын белсенді білім алушыларды бағалап отырды.Нәтижесінде білім алушылар өз білімін өзгелермен салыстыра отырып, өзін қай деңгейде екенін дәлелдеді.Сақып Айгерім, Асқар Диас, Абубакир Ерасыл, Шайділда Ұлдана, Сапарбаев Тұрсынбек деген қатысушылар сабақ барысында өздерін жақсы қырынан көрсете білді.
29.01.2020 күні Қ.Уразалиева 7 «А» сыныбында «Деректер типтері» тақырыбында ашық сабақ өтті. Оқушыларды «Теңге алу» ойыны арқылы 2 топқа бөліп, білім алушыларды бағалау парақшалары арқылы бағалады. «Қарлы кесек» әдісі арқылы үй тапсырмасын сұрады. Жаңа білімді «Bilim Land» сайтының материалдарына сүйене отырып түсіндірді.Сабақ соңында «Блоб» ағашы бойынша кері байланыс орын алды.
30.01.2020 күні Ж.Алдатаева және А.Сарсенованың ұйымтастырумен ұйымтастырумен 5 -11- сынып оқушылары арасында білім алушылардың жеке тұлғалық қасиеттерін қалыптастыру және логикалық ойлауын кеңейту мақсатында «Информатика, физика және математика- ғажайыптар әлемінде» тақырыбында кеш өткізілді. Кеш барысында оқушылар математика, физика, информатика пәндері туралы өлеңдер оқып, сөзжұмбақтар шешіп, әндер шырқалып,өмірді информатика, физика және математика пәндерімен байланысты екенін шығармашылық жұмыстар арқылы көрсетті. Кеш соңында апталыққа белсене қатысқан оқушылар және кіші мектепішілік математикалық олимпиадасының жеңімпаздары дипломдармен марапатталды жане информатика, физика және математика тілдерінде тілектер жазылған кәмпиттер таратылды.Кеш жоғары деңгейде өтті.
Онкүндікке бірлестіктің барлық мұғалімдері белсене қатысты. Қорытынды отырыс директордың ғылыми – әдістемелік ісі жөніндегі орынбасары С.Шаршыбаеваның қатысуымен өтті. Онкүндіктің жұмысы өте жақсы деп бағаланды.